السلام عليكم، هذا أول منشور غانشارك معاكم فيه دكشي اللي كنعرف حول الذكاء الاصطناعي بعد ما كتبت منشور سابق على طريقة اللي غانعتمدو عليها باش نتعلمو من بعضياتنا و كنتمنى تنجح.
أوك باسم الله ههه، الذكاء الاصطناعي واحد الآلية كتخلي الحاسوب يفكر و يتخذ القرار بنفس طريقة تاع ذماغنا فاش كايقرر شي قرار. قبل ماندخل فالموضوع كيفاش كايطرا هادشي، خليوني ندوي ليكم على التاريخ تاع الذكاء الاصطناعي حيت هو ماشي شي حاجة جديدة كيفما كايسحب شحال من واحد ولكن هو بان تقريبا فوقت الحرب العالمية الثانية من طرف منظمة داربا اللي كتحسب من كبار منظمات البحث العلمي الخاصة بالجيش الأمريكي، من بعد خرج THE MODREN AIو باش تشوفو هاد الأخير قداش منتشر غانعطيك مثال فاش كتبغي تكتب شي رسالة فكلافي د تيل تاعك و كايبقاو يبانو ليك كلمات فلفوق بدون ماتكمل الكلمة و كاينين شي كلمات كاتكتبهوم بزاف لدرجة وليتي غير كتكتب الحرف الاول الكلافي كايتوقع بلي راك بغيتي ديك الكلمة اللي كتكتب بزاف (مثلا كلمة afeen التيل تاعك راه ماكانش كايعرفها من قبل و لكن ملي لاحظ انك كتكبها بزاف ولى كايتوقعها و كايبينها ليك) و هادشي كامل راه ماشي جديد و كايتم باستعمال خواريزميات في AI ، و لكن ولينا كنسمعوه الذكاء الاصطناعي بزاف حيت هاد AI أسيدي مابقاش ساهل مابقاش غير كايتستعمل غير ف الكلافي مي راه دخل فالطب و بزاف تاع المجالات اللي يقدرو يغيرو العالم.
غاتقول ليا أسماعيل طلقنا أخويا كيفاش كايتم اتخاذ القرار ؟ كيفاش الجهاز غايفكر غير بهادشي اللي قلتي لينا؟
أوك دابا باش يتم اتخاذ القرار خاص يكونو بعدا عندنا معلومات ( DATA ) ، و انطلاقا من هاد المعلومات كيتم اتخاذ القرار. و لكن باش نوضح ليك أكثر تخيل نتا أستاذ كتصحح الأوراق د الامتحانات ديال التلاميذ ديالك. كتقرى الجواب كتشوف واش صحيح ولا لا و كتعطيه النقطة و هكذا تماما كيخدم الذكاء الاصطناعي كايحاول يتخذ واحد القرار فبلاصتك بنفس التفكير ديالك أ السي المصحح بناءا على المعلومات اللي ديجا علمناها الحاسوب من قبل حيت نتا قبل ماتصحح اعتمدتي على معلومات عندك فبالك حول المادة اللي كتقري. أوك كيفاش كنعلمو الحاسوب هاد المعلومات ؟
الذكاء الاصطناعي عندو مشتقات بحال machine learning و deep learning. غانعاود نعطيك أمثلة، تخيل نتا عندك ولد صغير و وريتيه 5 صور ديال أرنب، اذن ولد فاش غادي يشوف شي داك الحيوان فشي بلاصة غادي يدير recognition و غايعرف بلي هذاك الحيوان هو أرنب، مزيان؟ تخيل هاد ولدك وريتي ليه سلك ضوئي و قلت ليه فاش هاد السلك كايكون branché و معري راه كاشكل خطر و ماخصناش نقيسوه، ولدك الصغير فاش غاشوف شي سلك غادي يدير recognition و يعرف بلي راه سلك و عاد غايشوف واش برونشي ومعري و غايتخذ القرار واش يقسو ولا مايقيسوش.
الدور تاع machine learning هو كيخلي تقنيات الذكاء الاصطناعي تكتسب العلومات بطريقة آلية و التعلم من الأخطاء.نرجع للمثال تاع ولدك هههه، تخيل انه ديما كايمشي من واحد الطريق و كايضربوه الدراري اللي فعمرو و كايكونو فديك الطريق، ولدك غادي يفكر بلي ديما كايكل العصا فاش كايدوز من تما اذن خاصو حل و الحل هو يبدل الطريق. اذن هنا راه استافد من الخطأ تاعو. كنحاول نقسم الخطوات اللي كايدوز منهم التفكير تاع الابن غير باش يبان ليك تقسيم تاع الخطوات بالنسبة كون كانو داك الابن حاسوب كايتمشى. تخيل هاد الولد انه تلقى فديك الطريق الجديدة باصدقاء جدد و كون بيئة جديدة ديالو و كايتعلم منهم شي حوايج جداد. نفس الشئ اللي كايطرى للحاسوب ماشي ديما حنا اللي كانعطوه معلومات باستعمال خوارزميات الماشين الليرنينغ ولكن كايصنع واحد البيئة دايرة بيه و كيتعلم منها حيت راه مانقدروش نعطيوه كلشي ضروري غايزيد شي حاجة يكتشفها راسو بحكم البيئة اللي هو فيها هو و هكذا كنقولو انه الحاسوب ولى يتعلم راسو .
كنظن غاتكون دابا وليتي قادر تفرق بين AI و ML ، و دابا بغيت ندوز بيك les catégories تاع ai و فين تقدر تخصص ايلا بغيتي تكمل ف المجال و اللي هوما : البحث العلمي، سونطر دابيل و المساعد الوهمي، الطب، الالعاب،.برمجة التطبيقات...الخ كنتمنى تكونو استفدتو شوي و عرفتو كيفاش الالة كتعلم و كيفاش كاتخاذ القرار و كتستافد من الاخطاء.
متفق معاكم هادش نظري و لكن راه خاص تفهم هاد الأساسيات حيت ضروري غادي تدوز منهم باش تعلم لشي حاجة advanced. عارف بلي طولت عليكم و لكن راه غير بغيت نوصل ليكم الفكرة باش تشدوها مزيان فدماغكم، هادشي حتا انا راه غير تعلمتو من بلايص أخرين و ان شاء الله غانحاول نكمل الجزء الثاني و الثالث ..... حتى نشارك معاكم غاع دكشي اللي عارف على الذكاء الاصطناعي.
إسماعيل فداوي ❤️